WILLIAMNAGAR : East Garo Hills a·jani Do·bu Chitimbing songo matchotgija donenggipa skul nokko matchote rikatchina aro Do·bu Rimding Lower Primary School-o bangbang ong·e dongenggipa skigipani kamko ta·raken gapatchina didie, A·chik Holistic Awakening Movement (AHAM) Do·bu Regional Unit, East Garo Hills a·jani Deputy Commissioner-na sedoataha.
Iani bidingo East Garo Hills a·jani Deputy Commissioner-na seachi u·iatengon, Do·bu Chitimbing skul nokko rikani bilsigni atamang ong·pile matchotgija donchipengani a·sel skulo poraienggipa chatro chatrirang, skul nokrang dongjae, neng·nikanirangko chagrongna nangtokenga ine AHAM Do·bu regional unit parakatenba, ia skul nokko rikani bidingo inquiry-ko dakchina aro skul nokko ta·rake matchotate on·na gita ge·etaniko on·china didiataha.
Do·bu Rimding LP skulo skigipa saksa, ia bilsini April jao kamoni neng·takangani ja·man ia skulo skigipani kam bangbang ong·e dongna nangenga ine janapatengon, ia skulna substitute ba gital skigipakoba rakkikujaengani a·sel, skulo skigipa chu·ongjae, chatro chatrirang neng·nikanirangko man·na nangenga ine AHAM Do·bu regional unit parakataha.
Da·o final exam ba bon·kamgipa porikkako ong·atna somoirang bang·jaengani gimin ia skulna ta·raken skigipako rakkidapchina gitaba AHAM Do·bu regional unit, East Garo Hills a·jani Deputy Commissioner-ko didiataha.
“Uni gimin Do·bu Chitimbing skul nokko ta·rake matchotate on·china aro Do·bu Rimding LP skulna da·o bon·kamgipa porikkana skangan skigipako rakkidapchina chinga District Administration-ko mol·molenga,” ine AHAM Do·bu regional unit parakataha.
Ia chittini copy-rangko AHAM Do·bu regional unit, East Garo Hills a·jani Sub-Divisional School Education Officer aro skultangtangni managing committee-rangnaba on·ataha.
