TURA: A·chikrangoni saksa ki·tap serakgipa aro Sahitya Akademi Bhasha Samman-ko man·gipa Llewellyn R Marak, Sombar walo, Tura-ni hospital-o a·gilsakko watangaha.
Bilsi 89 ong·gipa Llewellyn R Marak, bilsi re·anganichi saanirangko man·ani ja·man, Sombar salo, a·gilsakko watangaha.
Tura RC Road-oni Llewellyn R Marak, jekon manderang, ka·sabee ‘Pangrakpa’ ine okamtokachim, an·tangni janggi tangmiting somoirango bang·en ki·taprangko seaha aro uni iandake ki·tap serakgipa ong·anina 1999 bilsio ‘Sahitya Akademi Bhasha Samman’-ko on·aha.
Marak-ni seanggipa ki·taprangoni mitamrangara, 1987 bilsio Tura Book Room-ni chapa ka·gipa ‘Pa Togan Nengminja Sangma’, ‘Ring·ani’, ‘Balpakram’, ‘Dikki-Bandi’ aro gipinrang ong·a.
Llewellyn R Marak-ni seanggipa bang·bata ki·taprangan, A·chikrangni daka rikani aro A·chik a·songni mingnamanio pangchake segimin ki·taprang ong·a.
Sea jotaniosan ong·aigija Marak sagi, A·chikrangni doka dam·ani, ganding chinding aro dingtang dingtang daka rikanirangoba jatni gam-jinrangko ripinge rakkina gisiko nanggipa mande saksa ong·achim.
Garo Hills-o Hundred Drums Wangala manianiko a·bachengdilgiparangoniba ua saksa membor ong·paaha aro ua an·tangan chrokanioba bak ra·paaha.
Una agreba Llewellyn R Marak, noksa salani, photo ba jachipchang de·ani aro uandakgipa kamrangoba gisik nanggipa mande ong·achim.
Uni sianganina Meghalaya a·dokni Chief Minister Conrad K Sangma-ba kalimpaaniko parakataha.
Llewellyn R Marak-ni sianiara, A·chik jat gimiknan dal·bea gimaani ong·aha ine janapatengon, uni dongrikenggipa nokdangna aro pilak ka·sagiminrangna a·dokni Chief Minister, an·tangni kalimpaaniko on·ataha.
Apsan daken, Tura-ni MP Saleng A Sangma-ba, Llewellyn R Marak-ni sianina an·tangni kalimpaaniko parakataha.
“Uni seanirangchi ua A·chik jatni daka rikanirangko aro niam retirangko ripinge rakkina bang·en on·gilangaha. Uni sea jotani aro u·i-ma·sianirangko pangnan A·chik jat gisik ra·kamgen. Uni sianganiara, uni nokdang aro ma·drangrangnasan gimaani ong·jaha indiba A·chik jat gimikna aro sea jotani a·gilsakna dal·bea gimaani ong·aha. Nokgipa Isol, kalimenggipa nokdangna ka·dimeani aro pattianiko on·angkuchina,” ine Tura MP parakataha.
