West Garo Hills, a·jani Amongpara jolo mobile network aro internet namsrangjae neng·nikaniko man·enganina 8-Amongpara GHADC Constituency-o Garo National Council (GNC) candidate ong·e susana sienggipa Jakrak A Sangma West Garo Hills, Deputy Commissioner-na sedoaha.
Amongpara-ni ning·o donggipa songrang jedake Agindangre, Rongkugri, Sasatgre, Dura A’simgre, Rongsigre, Rongpinggre, Karijoragri, Nokwatgre, Dobagre, Durabanda, Kalupara aro sepangjolo donggipa gipin songrango mobile network aro internet namsrangjae bang·a neng·nikanirangko chagrongna nangenga.
Neng·nikanirangko aganangskaengon, janapgimin songrango aro uni sepangjolo donggiparang 2G-na agre 4G/5G dongja ba signal-an dongsrangja, online class, net-banking aro Aadhaar rangko somoi gita ka·na man·ja, nangchongmotani somoirango ba Ambulance-na call-rang ka·na namedake man·ja, internet namjani a·sel digital payment aro sorkarini u·iatanirangko ma·sina man·ja aro bang·a chatro chatrirang aro chadamberang uamangni poraianirangko mobile network aro internet service namjani a·sel neng·nikaniko chagrongna nangenga.
Ia neng·nikanirang ru·uta somoirangonin ong·baenga iana badi ka·genchimoba telecom company maming namdapatniko dakjaenga ine Sangma aganangaha.
Uni gimin ia neng·nikanirangko namatna BSNL, Jio aro Airtel tower gital-ko songchina, authority-rang aro telecom company-rang nambata mobile network aro internet service-ko on·a gita ia neng·nikaniko mongsonggipa ong·e ra·china aro neng·nikani aro obostarangko u·ina gita a·damona re·e nichina 8-Amongpara GHADC official GNC candidate Jakrak A Sangma Deputy Commissioner-ko didiangaha.
